भारतीय राजनीतिमा नयाँ तरङ्ग !

सामान्य चर्चामा रहेका योगी आदित्यनाथलाई अचानक उत्तर प्रदेशको मुख्यमन्त्री नियुक्त गरेकै शैलीमा भारतीय जनता पार्टी समर्थित एनडीए गठबन्धनले विहारका राज्यपाल रामनाथ कोविन्दलाई भारतको भावी राष्ट्रपतिको उमेदवार बनाएको छ । यो समाचारसँगै फेरि एक पटक भारतीय राजनीतिमा नयाँ तरङ्ग आएको देखिँदै छ । कोविन्द भाजपाभित्रका दलित चेहरा हुन् । 

उपेक्षित र दलित समुदायका रामनाथलाई हिन्दूवादी र दलितविरोधी पुरातनपन्थी भनेर आरोप लगाइने गरेको भाजपाले यसरी राष्ट्रपति पदको उमेदवार बनाउला भनेर कमैले विश्वास गरेका थिए ।

वास्तवमा राष्ट्रपतिका लागि सम्भावित उमेदवारहरूको ‘टप फाइभ लिस्ट’ मा रामनाथको नाम चर्चामै थिएन । सञ्चारमाध्यममा समेत रामनाथका बारेमा खासै चर्चा भैरहेको थिएन । तर सोमबार अचानक बीजेपी अध्यक्ष अमित शाहले भावी राष्ट्रपतिका रूपमा एनडीए (राष्ट्रिय जनतान्त्रिक गठबन्धन) का तर्फबाट रामनाथको नाम प्रस्तुत गरे र सबैलाई आश्चर्यमा पारे ।

रामनाथको उमेदवारीले आफूलाई निकै प्रगतिशील देखाउन चाहने कांग्रेस, वामपन्थी र समाजवादी पार्टीहरूको गठबन्धन युपीए (संयुक्त प्रगतिशील गठबन्धन) सामु गम्भीर चुनौती खडा भएको छ । यस्तो लाग्दैछ, अब राष्ट्रपति पदको प्रत्यासीका रूपमा विपक्षी गठबन्धनले जसलाई अगाडि सारे पनि उनीहरूको उमेदवारीको सान्दर्भिकता समाप्त भएको छ र उनीहरूका तर्कलाई पनि पूर्णविराम लागेको छ । रामनाथको उमेदवारीसँगै राष्ट्रपति पदलाई लिएर सुरु हुन लागेको भारतीय राजनीतिको चुनावी लडाइँ भारतीय जनता पार्टीले जितिसकेको अनुभव धेरैले गरेका छन्, भलै रामनाथको जय पराजयको घोषणा हुन अझै केही दिन लाग्नेछ । 

त्यसो त भाजपाले रामनाथको नाम घोषणा गरेर विपक्षलाई समेत मनाउने प्रयास गरेको देखिन्छ । विपक्षी पार्टीहरूले राष्ट्रपतिमा पहिले भाजपाले नै उमेदवार घोषणा गरोस् भन्ने चाहिरहेका थिए र भाजपाको उमेदवारी हेरेर आफ्नो उमेदवार घोषणा गर्ने रणनीतिमा थिए । अब विपक्षीहरूले २२ जूनमा बैठक गरेर आफ्नो उमेदवार घोषणा गर्दैछन् ।

तर रामनाथको उमेदवारीले विहारका मुख्यमन्त्री नीतीशकुमार र उत्तर प्रदेशका सपा एवं बसपा नेताहरूको सहानुभूतिसमेत उनैतिर तानिन सक्ने सम्भावना बढेपछि युपीए गठबन्धन निकै दबाबमा परेको र तत्कालै प्रतिक्रिया व्यक्त गर्नसमेत अनिच्छुक रहेको देखिएको छ ।
राष्ट्रपति पदको उमेदवार बनेसँगै रामनाथ कोविन्द प्रधानमन्त्री नरेन्द्र मोदी र भाजपा अध्यक्ष अमित शाहसँग भेटघाट गर्न दिल्ली पुगिसकेका छन् । बीजेपीका प्रमुख नेताहरूसँग दिल्लीमा उनको भेटघाट समेत भैसकेको छ । उनी दिल्ली पुग्दा भाजपाका केही वरिष्ठ नेताहरू उनलाई स्वागत गर्न विमानस्थलमै पुगेका थिए ।
यसअघि विहारका राज्यपाल रहेका रामनाथ कोविन्द एनडीएका तर्फबाट राष्ट्रपतिको उमेदवार बनेपछि विहारका मुख्यमन्त्री नीतीशकुमार राजभवन पुगेर उनीसँग भेटघाट गरेका थिए । नीतीशकुमारले रामनाथलाई समर्थन गर्छन् वा गर्दैनन् भन्ने कुरा अझै स्पष्ट भैसकेको छैन । तर केही दिनअघि प्रधानमन्त्री नरेन्द्र मोदीको निम्तोमा नीतीशकुमार उनको आवासमा खाना खान पुगेको र उनीहरूबीच गोप्य छलफल भएको समाचार बाहिर आउनुको रहस्य यतिबेला आएर खुलेको महसुस सबैतिर भैरहेको छ । रामनाथलाई उमेदवार बनाउने काम मोदीले नीतीशकुमारसँग सल्लाह गरेरै गरेका रहेछन् कि भन्ने आशंकालाई पछिल्लो घटनाक्रमले पर्याप्त पुष्टि गरेको छ ।
‘‘रामनाथलाई भोट दिनुहुन्छ त ?’’ भन्ने प्रश्नमा जनता दल युनाइटेडका नेता नीतीशकुमारले भनेका छन्, ‘‘यो प्रश्नको उत्तर अहिले दिनु उचित छैन । मेरो लालुजीसँग कुराकानी भएको छ । सोनियाजीसँग पनि फोनवार्ता भएको थियो । मैले आफ्नो भावना उहाँहरूलाई अवगत गराएको छु । तर यसबारेमा पछि पनि कुराकानी हुन्छ । मेरा लागि व्यक्तिगत तवरमा विहारका राज्यपाल देशको राष्ट्रपतिका उमेदवार घोषित हुनु प्रसन्नताको कुरा हो ।’’
कोविन्द वरिष्ठ अधिवक्ताका रूपमा सार्वजनिक छवि बनाएका राजनेता हुन् । उनले १६ वर्षसम्म सर्वोच्च अदालत र दिल्ली उच्च अदालतमा वकालत गरेका थिए । उनी भाजपाका तर्फबाट राज्यसभा सांसद बनिसकेका छन् । उनी राष्ट्रपतिमा चुनिए भने के.आर. नारायणन्पछि दलित समुदायबाट भारतको राष्ट्रपति बन्ने दोस्रो व्यक्ति हुनेछन् । उनी उत्तर प्रदेशको कानपुर जिल्लाअन्तर्गत परौंखा गाउँका बासिन्दा हुन् । उनी राष्ट्रपतिको उमेदवार बनेपछि उनको गृहनगर कानपुरमा खुसीयाली छाएको र उनका छिमेकीले मिठाई बाँडेको खबर केही भारतीय सञ्चार माध्यमले दिएका छन् ।
रामनाथले आगामी २३ जूनमा मनोनयनपत्र दाखिल गर्ने बताइएको छ ।